குறிஞ்சி மலர்கள்

துடித்துக் கிடந்த அறுந்தவால் அடங்குமுன்னே, தேடிப் பிடித்து அந்தப் பல்லியின் தலையில்போட்டாள்... கண்ணை மூடுமுன் கடைசியாக நினைத்தது பல்லி... மனிதனின், உச்சந்தலையில் வீழ்ந்தால் நிச்சயம் மரணமென்று அப்போதே சொன்னார்கள், அலட்சியமாய் இருந்துவிட்டேனென்று!

அழைப்புவந்த வேலைக்கு அவசரமாய்க் கிளம்பினான்... வளர்பிறையில் போகலாமென்றாள் வெத்திலை வாயுடன் பாட்டி; அமைதியாய் ஆமோதித்தாள் அடுக்களைப்பக்கமிருந்து அம்மா... மறைமதிக் காலம் முழுமையாகக் காத்திருந்து, வளர்பிறை வந்ததும் போய்விட்டுத் திரும்பிவந்தான்... வாசலிலேயே காத்திருந்தது பாட்டி... வருத்தத்தோடு சொன்னான், அமாவாசையில பிறந்த ஒருத்தன் அந்த வேலையில் அமர்ந்துவிட்டானென்று...