மதிய விடுப்பு!
பத்து நிமிஷம் தாமதமாய் ஆனதுக்கு இத்தனை சத்தம்போட்டிருக்கக்கூடாது... பார்த்துப் பார்த்து சமைத்துக் கொடுப்பவள் அவள், என்ன சாப்பிட்டாளென்று கண்டுகொண்டதில்லை... படுக்கிறவரைக்கும் ஓடியாடி உழைக்கிறவள் உறங்கினாளா என்று ஒருநாளும் யோசித்ததில்லை... திறக்க மறுத்த சாப்பாட்டுப் பாத்திரத்தைத் வலிந்து திறக்கையில் உள்ளே நிறைந்திருந்தது அவள் கைமணம்... அவள் ஒருவேளை, அழுதுகொண்டிருப்பாளோ? திறந்த பாத்திரத்தை திரும்ப மூடச்சொன்னது மனசு... முதலாளி திட்டினாலும் பரவாயில்லை, இன்று, மதியச்சாப்பாடு மனைவி கூடத்தான்!